Kalbuady Koko ‘Subar’ husi Justisa ho Imunidade

Fransico Kalbuady, Sekretáriu Jerál (SG) partidu CNRT iha hela kazu abuzu podér, korrupsaun ho pekulatu iha tribunál. Nudár ministru turizmu, Kalbuady mós iha posibilidade atu hetan investigasaun relasionadu ho projetu sira ne'ebé nia halo iha Rejiaun Autónoma Oecusse-Ambeno bainhira auditoria hahú.

Atu evita ninia responsabilidade kriminál no halai husi auditoria, Kalbuady sei fila fali ba Parlamentu Nasionál no retoma ninia pozisaun nudár deputadu. Hanesan deputadu, Kalbuady hetan imundiade husi investigasaun kriminál.

**Enkuantu Francisco Kalbuady tenta halai husi lei, deputadu CNRT husi Aileu, Sr. Domingos, tenke sakrifika ninia kadeira iha Parlamentu Nasionál. CNRT prefere salva Kalbuady duké assegura Aileu-oan sira nia lian iha Parlamentu Nasionál**

Karik maluk leitór sira hein atu Aliansa Maioria Parlamentár foti asaun hodi retira Kalbuady nia imunidade atu nune'e nia bele submete ba justisa, entaun maluk leitór sei hein saugate de'it.

Nein deputadu sira husi Partidu Libertasaun Populár (PLP), ne'ebé forma ho objetivu atu kombate KKN no abuzu podér, sei taka ibun.

De faktu, PLP rasik mak sei fó protesaun ba Francisco Kalbuady husi prosesu judisiál.

PLP apoia formasaun AMP la'ós atu luta ba interesse públiku maibé atu hetan kadeira no proteje KKN.

Timor-Leste tomak koñese sé mak Francisco Kalbuady. Ninia krime ne'ebé durante ne'e ita akompaña mak hanesan tuir mai:

1. Viola lei naturalizasaun hodi fó passaporte ba ema estranjeiru sira atu sira bele reprezenta Timor-Leste iha turnamen internasionál futeból nian. Ho aktu ida ne'e, Kalbuady destroi totál ita nia federasaun futeból to'o FIFA mós bandu ita atu tuir kompetisaun internasionál.

2. Simu subornu husi FIFA tuir alegasaun ne'ebé mak ofisiál FIFA no investigadór sira fó sai. Subornu ho montante $50.000 ne'e ho objetivu atu Kalbuady apoia kandidatu FIFA husi Médiu Oriente.

3. Francisco Kalbuady ho Jacinto Rigoberto (deputadu CNRT) fasilita fundu ilegál ba partidu CNRT iha tinan 2012. Kazu ida ne'e mak halo Kalbuady ho Jacinto Rigoberto sai arguido iha TDD, to'o ohin loron. TDD uluk husu ba Governu no Parlamentu atu hasai Kalbuady nia imunidade, maibé la hetan kooperasaun.

4. Projetu jardín Lifau ho Oebau, ne'ebé gasta orsamentu $2,4 miloins. Projetu ne'e hahú iha 19 Setembru 2016 maibé liu ona tinan ida resin mak projetu ne'e paradu. Auditoria ne'ebé oras ne'e atu hahú iha RAEOA sei akuza mós Kalbuady.

5. Durante tinan 5 nudár ministru turizmu, Kalbuady oho tiha setór importante ida ne'e. Aleinde organiza eventu "miss", Kalbuady gasta osan miloins atus resin maibé polítika ka infraestrutura turizmu nian nein ida iha. Kalbuady mós gasta besik $1 milaun hodi selu foto model ida husi Austrália atu halo vídeo promosaun ba turizmu iha Timor-Leste. Maibé to'o ohin loron, Timor-Leste laiha setór turizmu ida atu ajuda diversifika ekonomia.

Nudár SG partidu CNRT, Kalbuady iha poténsia atu kaer kargu importante iha governu karik AMP manán. Kalbuady mak portavós partidu CNRT nian hodi halo negosiasaun ho Taur Matan Ruak. Kalbuady mós sei okupa lista AMP nian ho númeru ki'ik hamutuk ho Taur Matan Ruak.

Nudár votante, ita mak tenke loke matan ba partidu sira nia promesa iha eleisaun antesipada oin mai. Partidu balu sei tun ba hodi promete kombate KKN no defende boa governasaun. Maibé sira nia aktu, hanesan PLP halo dadauk, justru kontraria hotu sira nia promesa. Envézde kombate korrupsaun ho abuzu podér, PLP rasik mak reforsa fali hodi taka dalan ba prosesu judisiál hasoru suspeitu sira.

Ba militante sira ho leitór sira seluk, ita tenke ejije nafatin atu ema hotu-hotu respeita ita nia lei. Ita tenke husu ba deputadu AMP sira ne'ebé garganta dehan defende Konstituisaun atu defende uluk ezemplu di'ak. Se deputadu AMP sira mak taka dalan ba ita nia prosesu justisa atu aplika lei hodi kaer korruptór sira, oinsá mak sira dehan sira sei defende konstituisaun? Daudaun ne'e, ita bele haree momoos katak AMP la'ós atu defende konstituisaun maibé atu salva koruptór sira.

Mai, hamutuk ejije ita nia direitu no justisa ba Povu tomak. Iha Timor-Leste, lei tenke aplika ho hanesan ba ema hotu. Labele iha diskriminasaun!

Hamutuk, Ita Bele!
Ba Timor-Leste Ida Buras Liu!