Lista Membru Governu Problema Tanba Sala husi Primeiru Ministru

Reprezentante FRETILIN iha Parlamentu Nasional Joaquim do Santos Boraluli  konsidera aprezentasaun lista membru VIII Governu mosu problema sala husi Primeiru Ministru Sr. Taur Matan Ruak tanba la verefika kandidatu sira ne’ebé nia aprezenta tuir komprimisiu eleitorál no prosesu ne’ebé lao iha seitór justisa.

“Ita nia sala tiha, ita nia inosensia depois atira fali sala ba ema seluk, politíka saida mak ne’e, tuir lolos sira ne’ebé hetan kanselamentu ne’e husu rejignasaun hanesan ema, públiku hatene naran iha tribunál maibé lakohi husi rejigna-an , (interese) saida mak subar iha kotuk?,” dehan

Reprezetante Povu Joaquim.

AMP juizu mak eradu, Konstituisaun RDTL artigu 106 aliña 2 hatete momos, fó posse ba Membru Governu ne’e kompetensia Prezidenti da Repúblika no konaba semak atu ba hetan posse ne’e Primeiru Ministru nia kompetensia.

Tuir lolos, Reprezetante Povu Joaquim dehan,   partidu politika ne’ebé hetan fiar husi povu no  hatudu Primeiru Ministru  ba Presidenti Repúblika atu  fó  pose tenki hatene ona,  elementu ida ne’ebé mak atu hola parte iha Governu ne’e tenki hatene no bazeia ona ba kriteriu politíku ne’ebé konstituisaun garante no partidu politíku sira defini ona iha sira komprimisiu eleitorál.

“Se iha indisius konaba membru Governu balun, ate publiku hatene (sira nia kazu iha tribunál), hau hanoin Primeiru Ministru  uza nia kompetensia husu ba iha kandidatu ne’e, bele foti ninia pozisaun, hau (haree) Primeiru Ministru  la halo ida ne’e,  se halo karik problema ne’e la mosu hanesan ne’e,” dehan Reprezetante Povu Joaquim do Santos.

Problema ne’ebé akontese agora laos kulpa Prezidenti Repúblika nian, nene tama iha juizu ne’ebe lori Primeiru Ministru  atu foti desizaun bainhira atu aprezenta kandidatura.

 Se Primeiru Ministru halo ida ne’e, “Hau fiar katak Primeiru Ministru  sei uza nia kompetensia la ses husi komprimisiu eleitorál , se konfiansa ne’ebé nia foti ses husi nia komprimisiu eleitorál mak nia hakarak halo ida ne’emak bolu naran juizu eradu. Tanba juizu eradu depois ita atira fali kulpa ba ema seluk ida nemak bolu naran politika mafia,” dehan Reprezetante Povu Joaquim.

Prejunsaun inosensia, Reprezetante Povu Joaquim dehan, ne’e  liga ba desizaun iha tribunál laos kandidatu ba membru Governu.

Elementu ida tama ba tribunál los ka sala, maibé deskonfiansa tiha ona, se ikus mai Tribunal nia desizaun mak nia elementu ne’e sala,  entaun membru Governu ne’e tenki halai mai iha PN atu husu iminidade.

“ Ida nemak labele akontese mai subar iha Parlamentu Nasional ne’e, se ita hotu hamutuk atu luta kontra korrupsaun, ida nemak labele akontese,” dehan Reprezetante Povu Joquim do Santos Boraluli.