KAK Investiga Osan biliaun $1 Lakon iha Governasaun CNRT

Tuir KAK (Komisaun Anti Korrupsaun), hanesan fó sai iha jornál, osan estadu nian lakon biliaun ida durante tinan 10 CNRT lidera governu!

Dr. Adérito Pinto Tilman, Komisário KAK, hatete, "Kazu hirak ne'ebé KAK investiga, deteta osan estadu nian lakon kuaze bilaun ida resin", ka liu $1.000.000.000.

Hanesan komparasaun, OGE tinan 2017 Estadu aloka $1.386.826.000 hodi implementa programa sira iha edukasaun, saúde, agrikultura, infrastrulura, bee ho saneamentu, etc. Ita-nia orsamentu rekorrente (mínimu orsamentu atu mantén operasionál mákina estadu nian) hamutuk $8.00.000.000 de'it, la to'o biliaun ida.

KAK mós hatete katak iha kazu 20 resin mak relasiona ho abuzu podér, pekulatu, partisipasaun ekonómika iha negósiu no falsifikasaun dokumentu. Foin dadauk eis ministra finansas, Santina Cardoso, ba presta deklarasaun iha KAK relasiona ho kestaun ida ne'e. Eis ministra Emilia Pires halai lakon ba Portugal. Maibé Auditoria ne'ebé Governu da-7 hahú ona sei loke tan buat barak.

Osan biliaun ida bele sosa saida? Ida ne'e mak ema barak husu tanba sira la hatene, biliaun ida ne'e barak hanusá. Aleinde nato'on atu gasta hodi mantén ita nia nasaun to'o tinan ida, ita haree de'it saida mak osan biliaun ida resin bele halo:

1. Loke eskola 17.000 (eskola ida kusta purvolta $60.000 atu harii)
2. Harii 10.000 postu saúde ka ospitál 10 ho kualidade iha territóriu laran tomak
3. Loke estrada kilómetru 2.625, ka husi Dili ba Baucau, dala 21. Estrada Dili ba Baucau, 125 km, no ita deve $47.000.000 husi governu Japaun atu halo.
4. Harii tan portu boot 3 hanesan atu halo dadauk iha Tibar
5. Harii aeroportu Suai to'o 16 - bele tau iha munisípiu hotu-hotu
6. Halakon mal nutrisaun iha tinan 5 laran ho despeza $200.000.000 kada tinan
7. Loke barrajen 5 iha pontu estratéjiku oioin no kanaliza bee ba maioria populasaun, aumenta produsaun agrikultura

Sei barak tan!

Maibé saida mak akontese? Tinan 10 nia laran governante sira husi CNRT prefere hatama osan sira ne’e ba sira nia bolsu. Tinan 10 nia laran, povu lakon oportunidade barak atu hadi’a sira nia vida.

Agora CNRT hakarak kari rai rahun ba povu nia matan hodi promete kadoras mai Timor-Leste. Maibé povu sei husu responsabilidade ba Dionisio Babo, ba Francisco Kalbiady, ba Santina Cardoso, ba Ivo Valente, ba Ilidio Ximenes, ba Emilia Pires, ba Alfredo Pires, ba Gastão Sousa, no liuliu ba Maub Boot Kay Rala Xanana, osan $13 biloins bá para hotu iha ne’ebé? $1 biliaun ami hatene ona tama iha sé nia bolsu!

Maun Boot Xanana oras ne’e fera ulun atu manán Fronteira Marítima no kadoras mai Timor-Leste. Nia fera ulun hodi taka fali hahalok korruptu sira ne’ebé mak durante ne’e ema sira hanesan Francisco Kalbuady ho Dionisio Babo (sekretáriu jerál ho eis sekretáriu jerál) halo hodi dada Maun Boot nia naran ba tahu. Derrota iha 2017 hanesan indikasaun boot ida katak povu la fiar ona figura rezisténsia ida ne’e. Agora KAK nia deklarasaun ne’e sei estraga liu tan Maun Boot nia naran. Maibé sé mak tuir loloos responsabiliza? Ema sira ne’ebé hale’u Xanana!

Ba povu Maubere, tinan 10 nia laran sira haree ona: injustisa. Agora KAK konfirma ona katak dolar biliaun ida tama hotu ema balu nia bolsu. Dolar biliaun 13 mout iha CNRT nia “dezenvolvimentu”. Eleisaun agora povu sei husu responsabilidade ba sira dala ida tan.

Ba Militante sira, ita iha responsabilidade atu esplika ba povu eleitór, atu loke sira nia matan, katak hili CNRT la’ós hili Maun Boot Xanana. Maibé ita sei hili nafatin ema sira ne’ebé mak durante tinan 10 habokur sira nia an, sira nia família ho sira nia kroni sira. Maun Boot Xanana fera ulun atu lori dezenvolvimentu no justisa ba Timor-Leste. Partidu CNRT explora Xanana nia laran-di’ak hodi hariku sira nia an.

Militante sira halo apelu ba kompatriota hotu-hotu, liuliu belun sira iha PLP, atu loke matan. Tane CNRT hanesan tane korrupsaun ho injustisa hasoru povu Timor-Leste.

Militante sira sei kontinua nafatin ejije VII Governo Constitucional atu kontinua ho Auditoria ba instituisaun hotu-hotu iha governu. KAK mós tenke investiga loloos oinsá no tansá mak osan dolar biliaun ida lakon.

Militante sira mós kontinua ejije Estadu atu servisu maka’as hodi lori fali Sra. Emilia Pires, eis ministra finansas iha CNRT nia governu, mai Timor-Leste hodi hatán ba kazu korrupsaun hotu-hotu, inklui osan dolar biliaun ida ne’ebé lakon ba KKN.

Hamutuk, Ita Bele!
Ba Timor-Leste Ida Buras Liu!