Desizaun PR Legal, Jurista Facebook mak Ilegal

Atu resposta ba Jurista Melio de Jesus Akademiku Lisensiatura  de Direitu Administrasaun Estadu Muhandyah Malang Indonesia no Jurista Facebook, hafoin akompaña iha media social no eletronika ne’ebé kontinua kestiona nomeiasaun Primeiru Ministru VII Governu Konstitusionál ne’e  dehan inkonstitusionál.

Hanesan sidadaun Timor Leste laos Jurista ou hasai kursu bo’ot maibé hakarak uza mos hau nia direitu ne’ebé garantia iha Konstituisaun RDTL artigu 40 ne’ebé koalia konaba liberdade ba expresaun no informasaun hodi resposta Jurista akademiku bo’ot sira nia hanoin.

Hanesan artigu 106 alina 1 hatete ‘ Partidu ne’ebé hetan votu barak liu ka partidu sira ho aliansa ho maioria parlamentar mak hatudu Primeiru Ministru no Presidenti da Repúblika maka nomeia, rona tiha partidu polítiku sira ne’ebé reprezentadu iha Parlamentu Nacional.

Bainhira koko hare didiak esperitu husi artigu  ida 106 la sala kuandu Presidenti da Repúblika nomeia Primeiru Ministru husi partidu ne’ebé votu barak liu. Tanba Partidu ne’ebé hetan votu barak liu iha eleisaun Parlamentar tinan ida ne’emak Partidu FRETILIN.

Iha artigu 106 ne’emos hatete ‘Ka partidu sira ho aliansa maioria parlamentar’ ida ne’e opsaun segundu! Se partidu ne’ebé hetan votu barak liu la konsege aprezenta Primeiru Ministru maibé iha realidade partidu ne’ebé hetan votu barak liu aprezenta Primeiru Ministru.

Se mosu aliansa maioria parlamentar la siginifika katak, atu esklui fali FRETILIN nudar vensedor iha eleisaun Parlamentar periúdo ida ne’e. Demokrasia semak manan  ne’e manan laos lakon ho lakon halai hamutuk hodi esklui fali ida manan!

Artigu 106 mos hatete, nomeiasaun ba Primeiru Ministru  Presidenti da  Repúblika “Rona tiha partidu polítikiu ne’ebé reprezentadu iha Parlamentu nacional”

Ida ne’e, Presidenti Repúblika halo tuir tanba molok nomeia Primeiru Ministru , Presidenti da Repúblika  rona  Partidu CNRT, PLP no KHUNTO nia hanoin mak foin nomeia Primeiru Ministru ne’ebé aprezenta husi partidu FRETILIN no PD.

Hafoin inkontru ho Presidenti da Repúblika , Partidu sira ne’ebé mak asentu iha Parlamentu Nacional liliu Partidu segundu mais votadu  CNRT  deklara mantein opozisaun no sei apoio programa governu ne’ebé mak liga ba interese nasional.

Ho situasaun sira ne’e, Presidenti da Repúblika foti desizaun hodi respeita mos ba partidu   asentu iha Parlamentu Nacional  tanba,  matein sira nia pozisaun nudar opozisaun konstrutivu. Nune’e Presidenti da  Repúblika foti desizaun hodi nomeia Primeiru Ministru ne’ebé aprezenta husi Koligasaun FRETILIN ho PD .

Jurista Facebook barak  fo  sira nia argumentu oin-oin tanba sira la intende no la akompanha prosesu ne’ebé lao durante ne’e! abraco