Eis Membru Governu Balun Sei Lori Eskoltu

Eis membru governu balu  iha VI Governu Konstitusional agora dadaun sei lori Polisia Nasional Timor Leste (PNTL) hodi fó siguransa maske sira nia mandatu remata ona.

Deputadu Bankada FRETILIN Antoninho Bianco lamenta tanba laiha razaun atu PNTL fó nafatin seguransa ba eis membru governu ida ne’ebe nia mandatu remata ona.

“Ministru balun que eis ona  maibé sei lori Polisia, ne’e labele satan,” dehan Bianco iha plenaria 23 Outobru 2017.

Eis Titular sira iha direitu atu hetan siguransa tanba lei fó dalan maibé  labele tanba Polisia atu fó siguransa ba povu laos siguransa ba pesoál ema ida rua nian.

Deputadu iha PN, Bianco dehan, labele bolu fali Polisia atu fó siguransa espesial ba sira tanba sira reprezentante povu nusa mak tauk fali povu.

“Hau reprezenta povu e povu mak hili hau, e reprezenta duni povu, se ita mak tauk ona povu satan povu, reprezentante povu lalika tauk iha situasaun defisil mos. Rai ne’e hakmatek, povu ne’e hakmatek lalika tauk ita koalia deit mos tauk ona, ne’e labele. ,” dehan Bianco.

Bianco husu atu fó atensaun tanba Polisia atu ba fo siguransa ba povu.

 “Eis titulares sira ne’e tenki lori tanba lei hatete, sira nebe eis (ministru) ne’e la persiza, ita povu oan,reprezenta povu tan tauk fali povu halo seda. Diak liu polisia jaga povu, labele tutuir fali eis membru governu sira ne’e, laiha fatin,” dehan Bianco.

Estadu gasta osan atu fó siguransa ba povu laos ba fó siguransa ba ema ida rua.

Entertantu iha PN,  demokrasia los duni, Deputadu  ba tuur iha PN reprezenta povu maibe tanba samak tauk fali povu.