Lakohi Tranzisaun Poder ‘Dodok’ , Junta Organizasoens Rezistensia husu Lideransa Tenki Hamutuk

KONFERENSIA IMPRENSA JUNTA DAS ORGANIZACOES DA RESITENCIA PARA A DEFESA DA SOBERANIA NACIONAL

Hare ba situasaun politika rai laran nian, hafoin eleisaun parlamentar no tama iha faze forma Governu Dahituk, Timor-Leste hasoru tan dala ida situasaun krusial ne’ebé bolu ita tomak atu fó oin hodi buka lisuk solusaun ba, atu hamutuk tahan netik anin bo’ot ne’ebé hu hadulas dadaun ita.

Hare ba situasaun polítika rai laran nian, ne’ebé fó impaktu mos ba vida ekonómika Povo Maubere nian, nune’e, ho neon brani no oin foti, ami husi Junta das Organizasoins da Resistencia para a Defesa da Soberania Nacional, hamutuk liuhosi biban ida ne’e hakarak manifesta hanesan tuir mai: Tetu no Sukat, hodi hamriik metin iha mahon Unidade Timor-Oan nian, liuhosi biban ida ne’e hasai lian hodi bolu Timor Oan tomak, iha Partidu eh laiha Partidu, Feto eh Mane, Katuas eh Ferik no VETRANOS TOMAK, husik tiha ita nia interesse individuál, Grupo, Organizasaun ka Partidu hodi fó oin los ba interesse nasional, hamrik metin hodi tahan soberania nasional Timor-Leste nian; Tetu no Sukat, hodi hamrik metin iha mahon Unidade Timor-Oan nian ba Interesse nasional no moris diak Povo Maubere nian mak nu’udar alicerce hodi hamoris Partidu Politiko sira iha Timor-Leste; nune’e ami husi

 JUNTA DAS ORGANIZACOES DA RESISTENCIA PARA A DEFESA DA SOBERANIA NACIONAL husu:

1. Husu ba S.E. Presidente Republika Dr. Francisco Guterres “ Lu-Olo” usa nia competência tuir Constituisaun haruka hodi konvoka Maun Bo’ot Nain Tolu ( Xanana Gusmao, Mari Alkatiri no Taur Matan Ruak, Ulun Bo’ot Partidu ( PD no KHUNTO ) atu tur hamutuk ho Presidente da Republika hodi buka solusaun ba Situasaun ne’e iha tempo badak;

 2. Husu ba Maun Bo’ot nain tolu (Xanana Gusmao, Mari Alkatiri no Taur Matan Ruak ), nu’udar ulun bo’ot ba Partidu bo’ot tolu no ULUN BO’OT iha Timor-Leste, atu tur hamutuk hodi buka dalan atu fo solusaun ba naksalak ne’ebé mosu;

 3. Loke laran no fo oin ba malu, husu ba Maun Bo’ot sira Lider husi Partidu 5 iha assentu Parlamentar hodi hare hamutuk, hare lisuk no di-diak Programa ne’ebé pro-Povo hodi kumpri promessas ne’ebé uluk ita halo hamutuk ho Povo Maubere, nune’e bele ultrapassa tiha situasaun de “impasse” Politika no kumpri Tramites Constitucionais no halibur malu iha Dialogu ho bom sensu hodi Estabilidade no moris Povo ninian;

 4. Povo liu husi eleisaun parlamentar 2017 fo votus konfiansa ho mensagem ne’ebé k’momos tebes, katak “hodi malu ho malu”, atu forma Governu hodi ukun tinan 5 laran, hari estabilidade no Autoridade Governativa hodi ukun, tan Povo kolen ona atu iha tempo badak hakat fali ba urnas;

5.“Problemas iha Maun Bo’ot sira nia dominio, tan ne’e, Maun Bo’ot sira rasik iha kbit atu resolve” tau hotu ba kotuk buat hirak ne’ebé la tama no la monu iha Maun Bo’ot sira ida-idak nia laran;

 6. Nu’udar ema ne'ebé barak ka uitoan uluk kontribui mós ba prosesu luta ba Ukun Rasik Án Timor-Leste nian, ami ho laran triste teb-tebes, katak ba reprezentante povu nian iha Uma Fukun Parlamentu Nasionál, Povo Maubere precisa moris diak no saudavel, tan ne’e hatur interesse nasional as liu interesse grupo ka Partidu nian, tan programa ne’e Pro-Povo, katak atu hadia Povo nia moris.

7. Tranzisaun Gerasional ida ne’e sei la fo folin, wainhira Lideransa Nasional la hatudu NEON MATENEK, sei la fo folin, wainhira la hamutuk, sei la fo folin, wainhira iha Publiko nia oin ita hakoak malu ho hamnasa, iha kotuk ita hatun malu, hahalok ne’ebé sei transmite mos husi gerasaun ba gerasaun.

 8. Ami lakohi tranzisaun ne’ebé PODRE “DODOK”, ami hakarak Tranzisaun ne’ebé Saudavel, Seguru, Sustentavel no Duradoura:

 Dili, 27 de Outubro de 2017.- HUSI: JUNTA DAS ORGANIZACOES DA RESISTENCIA PARA A DEFESA DA SOBERANIA NACIONAL Balide, Sexta 27 de Outubro 2017