Opozisaun Halo ‘Teatru’ Politíka iha PN

Deputadu Partidu Demokratiku (PD) Luis Mendes konsidera deputadu opozisaun halo teatru politíka iha uma fukun povu nian, Parlamentu Nasional hodi ejizé VII Governu Konstitusional hadia kondisaun estrada, bee mos, inklui elitrisidade ba povu, maibé sira rasik rezeita programa VII Governu konstitusional ne’ebé fó prioridade ba problema estrada, bee mos, elitrisidade, edukasaun no saude, kampu servisu ba timor oan.

Iha plenaria Parlamentu Nasional loron 30 Outobru 2017, Deputadu opozisaun Jose Agostino husi bankada Khunto, husu problema atu rejolve problema estrada iha Municipiu Ermera Gleno ba Postu Administrativu Lete Foho to’o  Suku Katrai Leten.

“Estrada husi Gleno ba too iha Letefoho (depois)  ba too (suku) Katrai Leten, kondisaun ladun diak., laos ladun diak , memang ladiak duni, ida ne’e difikulta ita nia populasaun sira para atu bele halo viangen,” dehan Deputadu Agostino iha PN.

Deputadu  opozisaun ne’emos, kestiona problema povu iha Suku Katrai Leten balun seidauk asesu ba bee mos no elitrisidade airin ne’e sira monta durante tinan ida resin, maibe ate adata seidauk  dada fiu.

Iha fatin hanesan, Deputadu opozisaun Liandro Lobato  CNRT,  preokupa makas konaba problema bee mos ba komonidade sira iha Likisa tanba la asesu Bee mos.

Relasiona ho kestaun ne’e,  Deputadu PD Luis Mendes konsidera deputadu opozisaun sira halo teatru politika tanba sira rezeita tiha programa governu ne’ebé fo prioridade ba estrada, bee mos, elitrisidade, edukasaun, saude no kampu servisu ba timor oan inklui uma diak ba povu.

“Ami dadauk ne’e halo teatru iha parlamentu, (tanba) buat povu nian mak ami deskute, e depois ami lakohi  vota  ba  (afavor ba programa governu ida ne’ebe atu responde duni ba problema povu nian),” dehan Deputadu Demokratiku ne’e.

Iha fatin hanesan, Deputadu Antoninho Bianco hatete, Deputadu hothotu atu buka diak ba povu, tanba ne’e preokupasaun deputadu sira nian ne’e governu tenki rejolve liu husi  orsamentu retifikativu ne’ebé tuir planu governu sei aprezenta iha tenpu besik.

“Orsamentu retifikativu laos interese ba governu ida ne’e, laos interese ba deputadu sira iha ne’e maibe ba interese povu sira nian. Hanesan reprezentante povu, hau husu ba kolega sira, ema (governu) foin koalia ita (opozisaun) dehan vota kontra, ne’emak hau atu hatete lia los ne’e hanesan ne’ebé, ema (governu) foin perpara sasan (orsamentu retifikativu)  ita iha ne’e (parlamentu nasional) dehan vota kontra,” lamenta Bianco.

Demokrasia ne’e, Bianco dehan,  tenki liga ba povu nia hakarak , hanesan deputadu husi opozisaun sira) koalia konaba povu nia halerik estrada, bee mos, elitrisidade, saude no edukasaun.

Hatan ba preokupasaun sira ne’e, Ministru Presidensia Konselhu Ministru Adriano Nacimento hatete, ejizensia deputadu sira nian , VII governu fó prioridade problema sira ne’ebé mak deputadu PN foti.

“Hau hanoin ida ne’e ami sei tau iha programa (VII Governu) ba dala rua ami sei tau oportunidade konsidera konaba bee mos laos deit Likisa maibe iha fatin seluk seluk, ami espera ita boot sira (deputadu PN) bele aprova Bee mos ba povu Likisa no ba povu iha fatin hotu iha teritori Timor Leste laran tomak,” dehan Ministru Adriano.