PROGRAMAS GOVERNU REFLETA HO POVU NIA NESESIDADE , LAIHA RAZAUN KONTRA

Depoizde Le'e no Intende Planu Programas Governu No Konfirma Fali Ho Planu Estratéjiku Dezenvolvimentu Nasionál (PEDN 2011-2030), Atan-Hau Hakarak Reafirma katak Programas Ne'ebé Gov lori ba PN, Refleta Ba Piláres Importante 4 husi PEDN, maka hanesan:

1. Setór Sosiál
2. Dezenvolvimentu Infrastrutura
3. Dezenvolvimentu Ba Setór Ekonómiku
4. Konsolidasaun/Modernizasaun Institusionál

Husi Piláres 4 ne'e, Governu-Dahitu Dezenvolve Fali Ba Sub-Setorál Sira No Programas Temátikas Hodi Kumpre Durante Mandatu Tinan 5 maka Hanesan:
1. Governu Foun Nee Atu Prepara No Aprova Matadalan (RoadMap) Ba Implementasaun PEDN.
2. Governu nee iha Intensaun Atu Implementa Medida Hirak Ne'ebé Bele Garante Kualidade Ensinu Ba Nivel Edukasaun Hotu-Hotu.
3. Governu Konxiente katak, Persija Haluan Eskola Tékniku- Vokasionál Hodi Permite Estudante Dezenvolve Kompeténsia Prátika Hodi Fasil Asesu Ba Merkadu Servisu (Laboral).
4. Persija Halao Avaliasaun Dezempeñu Ba Papel Edukadór Sira.
5. Governu Sei Avalia Mapeamentu Eskolár, Hodi Bele Hari'i Dormitóriu (Asrama) Ba Estudantes Ne'ebé Hela-Fatin Dook Husi Eskola.
6. Governu Sei Integra Setór Kultura iha Prosesu Aprendijazem, kona-ba Valor Pozitivus, Identidade Nasionál, Sidadania no Respeita Mútua.
7. Ba Setór Saude, Gov Sei Aposta Maka'as iha Kuidadu Saúde Primáriu, Sidadaun Sira Nu'udar Foku Prinsipál.
8. Hasa'e Kualidade Atendimentu Médiku Espesialísta Hodi Solusiona Dezafiu Sira Ne'ebé Liga Ho Transferénsia Pasiente Ba Rai-Liur.
9. Gov sei Implementa Programa Nasionál Apoiu Ba Ekonómia Sosial no Solidária Ba Promosaun Koezaun Sosiál no Kriasaun Empregu (Servisu)
10. Gov sei Enfatíza Importánsia Boot Kona-Ba Partisipasaun Feto iha Merkadu Servisu, Edukasaun no Formasaun Profesionál.
11. Gov Sei Fasilita Hodi Hasa'e Numeru Traballdór Ba Korea Do Sul no Australia Hodi Manan Esperiénsia Profesionál No Hetan Rendimentu Hodi Ajuda Familia sira, ne'ebé Kontribui Ba Dezenvolvimentu Sosioekonómiku.
12. Gov Sei Kontinua Apoia Projetu Sira Kona-Ba Empreendedorizmu Ba Ema Sira Ho Difisiénsia, Dezempregadu no Graduadu sira.
13. Gov sei Kontinua Programa Asistensia Sosiál Ba Família Vulnerável Liu, Programa Bolsa da Mae, Programa Sosiál Sei Ajuda Kombate Kiak.
14. Gov sei Esforsu Atu Aprova no Implementa Lei Ba Protesaun Labarik.
15. Gov sei Kontinua Apoia Sosiedade Sivil Liu-husi Projetu Komunitária Sira.
16. Foin-sa'e Sira Sai Prioridade Ba Governu iha Dezenvolvimentu Sósiu-Ekonómiku ho Parseria Hamutuk Konsellu Nasionál ba Dezenvolvimentu Juventude iha Area Ortikultura, Pekuária, mekánika, elektromekánika, Karpintaria sst.
17. Gov sei Implementa Politika Nasionál Ba Habitasaun (Hela-Fatin) ho Dignidade ba Timor-oan Kbi'it Laek Sira.
18. Gov sei Kontinua Uza Reseita Fundu Petrolíferu ho Sustentabilidade hodi Finansía Infrastrutura ne'ebé Iha Ligasaun Metin ho Setór Ekonómiku.
19. Gov Sei Hasa'e Kualidade Infrastrutura, inklui Hirak Ne'ebé Hari'i Ona, liu-husi Konkorénsia no Akizasaun Públiku Ne'ebé Kompetitivu Liu.
20. Gov Sei Fó Prioridade ba Dezenvolvimentu Estratéjiku Ne'ebé Apar ho Prioridade Diversifikasaun Ekonómiku. Haforsa mós Kapasidade Avaliasaun Ba Projetu Potensiál iha Sekretariadu Ba Projetu Boot.
21. Gov Sei Haforsa Koordenasaun entre Projetu Sira Atu Hari'i Estrada Rurál.
22. Gov Sei Promove "Asesu Ba Bee Mos" Sufisiente, Seguru, Aseitável, Asesu Fiziku ho Folin Razoável.
23. Gov sei Promove Konstrusaun Barragem, Irrigasaun no Indentifika fonte bee foun.
24. Gov sei Halao Rehabilitasaun Ba Aeroporto Internasionál "Prezidente Nicolau Lobato" Ba Pista no Terminal Sira.
25. Gov sei Fasilita no Apoia Implementasaun Parseria Públika Privada (PPP) Ba Konstrusaun Portu Tibar.
26. Gov sei Dudu Fali Ekonómia, Esforsu no Atrai Investimentu Privadu Hodi Loke Dalan Ba Dezenvolvimentu Inkluzivu no Sustentável.
27. Gov nia Servisu Sei Foka Ba Implementasaun "Politika Reforma Fiskal Sira"
28. Dezenvolvimentu Setór Ekonómiku Nia Baze Maka Agrikultura (Populasaun liu 70%), Peskas, Pekuária, Turizmu no Industria sira, Gov Sei Prioritiza Setór Hirak-Ne'e.
29. Pontus Hirak Ne'ebé Temi iha Nu.28 sei Garante Seguransa Hahán no Nutrisionál no Promove Kreximentu Ekonómiku no Servisu iha Area Rural Sira.
30. Gov sei Insentiva Ajente Ekonómiku husi Setór Agrikultura Sira no Mobiliza Grupu, Asosiasaun Agrikultór inklui Feto&Mane (Kooperativa).
31. Gov sei Kontinua Implementa Planu Hasa'e Kualidade Karau-Malae, Karau-Timor ( Produs Na'an no Susuben), inklui Fahi.
32. Gov Sei Mobiliza Familia, Emprezáriu no Kooperativa Atu Promove Hari'i Empreza Agríkola.
33. Gov Reafirma, hodi Mantein no Apoiu Infrastrutura iha Kosta Sul, Projetu Tasi Mane, Supply Base, Refinaria no Industria Petrokímika. Sei kria Autoridade ida ho kompetensia própriu ba Administrasaun no Jestaun Komersiál.
34. Gov konxiente, TL iha Poténsia Turizmu Boot, sei Apoiu Infrastrutura Ne'ebé Adekuada Kona-Ba Transporte Aéru, Marítimu no Terrestre, Saude no Otel sira.
35. Gov Sei Promove Setór Turizmu nu'udar Indústria Ne'ebé Sai Katalizadór ba Diversifikasaun Ekonómiku TL nian.
36. Gov Sei Haklean Estudu ida Atu Hari'i Autoridade Nasionál Turizmu.
37. Gov Sei Halo Promosaun Ba Adaptasaun Ba Prátika-diak Kona-Ba Investimentu Diretu Estranjeiru (Foreign Direct Investment) iha TL
38. Gov sei Halo Lei Imigrasaun No Azilu Foun hodi Prosesa Vistu Ba Investidór Estranjeiru ho Lalais, Efisiente no Efikáz.
39. Gov hari Konsellu Seguransa Nasional sai Orgaun Konsultivu Governu nian no Elaborasaun ba Politika Seguransa Nasional, Politika Defeza no Politika Esterna.
40. Gov sei Apoia Modernizasaun ba Forsa Armadas, PNTL no Valoriza Ezersisiu Funsaun Lor-Loron Nian. Fo Dignidade Ba Veteranu Kombatentes sira.
41. Gov sei Ativu iha Politika Internasionál hodi Debate no Buka Solusaun ba Problemas Global sira iha Ámbitu Enkontru Nivel Multilateral.
42. Gov Sei Promove Reforma Estrutural Husi Administrasaun Justisa, Mellora Sistema Justisa Ne'ebé Besik liu ba povu.
43. Gov Kontinua Reforma Instituisionál Ba Setor Públiku Ne'ebé Transparante no Efisiente Hodi Sai Obstaklu ba Risku Korrupsaun, Hametin Monitorizassun no Fiskalizasaun no Hadia Transparénsia Orsamentál.

POVU MAK HARE NO JULGA RASIK, SE KARIK PROGRAMA GOV NE'E LA REFLETA BA IMI-NIA HALERIK LOR-LORON. MAI ITA HEIN, ABAN SEGUNDA-SEXTA. BANKADA 5 NIA POZISAUN BA PROGRAMAS Gov Nian. POVU AKOMPAÑA SAIDA MAK POLÍTIKU SIRA HALO IHA SEMANA NEE. BOA NOITE TL. ATE ABAN IHA PN. (Autor Anbrosio Fernandes).