Pr. Juvito: Semak Vota Kontra, Krize Akontese Keta Halai

Vigario Eposcopal asuntu Re-evangelizacao Diocese Dili, Padre Juvito Araujo hatete, partidu ne’ebé vota konta programa no orsamentu retifikativu depois mosu krizé , nia lider sira tenki responsabliza no keta halai sai Timor leste.

“Semak vota kontra rai ne’e tama iha krizé,  depois keta halai, keta halai ita hotu tangun (responsabliza) rai ida ne’e,” dehan Amo Juvito ba RTM  (071117).

Vigario Eposcopal asuntu Re-evangelizacao Diocese Dili ne’e dehan, partidu ou lider ho intensaun atu hamosu krizé, tanba sira lakohi hare povu ne’e kontenti, sira hakarak gosta povu ne’e tanis, povu halerik no lilir.

“Maibé labele susita, halo mosu, de propozitu halo mosu krize ida ne’e, para povu atu terus. Ita (lider) seidauk baruk hare ema tanis, hare ema halerik,” lamenta Amo Juvito.

Liders sira  kontenti no alegria bainhira hare  Povu barak preokupa hahan laiha, aimoruk laiha.

“Hau hanoin katak imi (deputadu/a)  persiza iha konsensia deit, atu halo pozisaun ida, hola desizaun ida hanoin ba povu laos hanoin ba imi nia an no partidu,” dehan Amo Juvito.

Ba liders partidu sira ne’ebé iha influensa iha partidu laran, Amo Juvito dehan, tenki iha konsensia nudar umanu.

“ Hau hanoin liliu liders sira, ne’ebe iha influensa makas iha partidu nia laran, buka atu toma konsensia ida, pelumenus laos ona hanesan sarani ida ba, laos ona hanesan politika (maibé) hanesan netik ema,” dehan Vigario Geral ne’e.

Se vota kontra nafatin programa Governu, depois Governu monu sei ba eleisaun antisipada , nudar sidadaun , Amo Juvito dehan, sira kuñese liders ne’ebé halo politika diak no ida ne’ebé halo politika ladiak.

“Se ita ba eleisaun antisipada mos , ami hatene semak politika diak, semak politika ladiak, ita ne’e penonton deit, semak politika diak, semak iha sentidu patriotismu, semak iha sentidu de estadu, semak iha nasionalismu forte sakrifika ninia interese, sakrivika ninia intensaun , sakrifika ninia gostu sira ba povu nia moris, ami hatene hotu,” dehan Amo Juvito.