Refleksaun Tinan 26 Masakre St.Cruz 1991, Politika Sira Keta Haluha Áswain Sira ne’ebé Mate ba Luta Libertasaun Nacional

Presidenti Bankada FRETILIN iha Parlamentu Nacional  Deputadu Francisco Branco hatete, refleksaun ba komemorasaun tinan 26 Masakre St. Cruz 1991 ba tinan ida ne’e (2017), iha momentu ida halo tranzisaun gerasionál , sidadaun hothotu liliu politíka nain sira bainhira deside buat ruma tenki ho konsensia no tau ás interese estadu.

“Espesialmente (komemorasaun) ba tinan 26, Estadu Timor Leste selebra loron ístoriku ida ne’e, sidadaun hothotu liliu politiku sira, tenki deside ho konsensia ho sentidu estadu, sentidu estadu katak tenki tau interesé ne’ebé bo’ot liu ba distinu nasaun nian duque ba interese grupu ka partidu ninian,” Dehan Prezidenti Bankada FRETILIN, Eis Preizoneiru Politíka Cipinan.

Selebrasaun Masakre St. Cruz 1991 tinan ida ne’e, Branco dehan , laos atu selebra no festeza deit maibé tenki halo refleksaun iha momentu ístoriku ida ne’ebé joven barak lakon vida iha  Masakre St. Cruz 1991.

Hatudu katak iha momentu ne’eba  komesa intrega luta rezistensia ida ne’ebé laos deit iha Frente Armada maibé  iha tenpu ne’eba komesa muda mai frente klandestina, hodi fó apoio ba Frente Armada no Frente Diplomasia ikus mai deside hili dalan haketak an husi Indonesia.

Joventude Lorico Áswain bainhira sira lori sira nia isin nurak mate iha St, Cruz sira hakarak buat ida diak ba futuru pais TL  bainhira hetan invazaun no hetan okupasaun husi militares Indonesia sira.

Tanba ne’e, persiza halo refleksaun ida ne’ebé porfundu atu hamutuk hodi hanoin ba sira ne’ebé se hirus matan, fó sira nia isin no sira nia fakar iha St. Cruz no  masakre sira seluk hanesan masakre Kraras Viqueque , Masakre Muapetini Losplaos no Masakre Mausiga Ainaro no seluk seluk tan.

“Ohin loron ita deside distinu nasaun nian tuir idaidak nia hakarak maibé  hanoin mos sira ne’ebé mate iha St. Cruz no Timor oan besik rihun atus tolu fó sira nia isin no ran ba rai ida ne’e,” dehan Branco.

Masakre St. Cruz  akontese iha loron 12 Novenbru 1991 , wainhira Joventude Lorico Áswain ho ante brani se hirus matan ba Militar Indonesia hodi hakarak TL sai pais ida independente no futuru ida diak ba Timor oan hotu.

Masacre  12 Novenbru 1991 nudar tranzedia ida nia dimensaun boot  hodi loke mundu internasional nia tilun no matan, liliu nasaun sira hanesan EUA, Uniaun Europeia hodi  hare problema TL nian no loke dalan ba autodeterminasaun povu Maubere.