Estrutura VIII Governu,AMP Halo Politíka Fahe Poder ba Malu

Maske Estrutura VIII oficialmente seidauk públika maibé iha media imprimi no media sociál fó sai ona estrutura VIII Governu ne’ebé posiblidade bo’ot sei lidera husi Primeiru Ministru VIII Governu José Maria Vasconselhos ‘TMR’ hamutuk ho membrus Governu nain, kompostu husi Ministru nain 20, Vice Ministru nain 11 no Secretariadu Estadu nain sia (9) totál membru  VIII  Governu hamutuk nain 41.

Hare husi estrutura VIII Governu ne’e hatudu momos AMP halo politíka fahe poder ba malu hodi fó kontenti  malu, maibé la tau sentidu oinsa atu koloka ema hodi rejolve problema povu no lori dezenvolvimentu nasional.

Iha estrutura VIII Governu ne’e, iha novo ministeriu ne’ebé iha hanesan, Ministru Edukasaun Juventude Desportu, Ministru  Ensino Superior Siencia no Teknolgia, Iha mos Sekretariu Estadu Juventude Desportu.

Iha Ministru Asuntu Kombatente Luta Libertasaun Nasional, iha mos Sekretariu Estadu  Assuntu Veteranus. Iha Ministru Interior, iha mos Vice Ministru Interior no iha tan Sekretariu Estadu Protesaun Sivíl.

Iha Ministru Planiamentu Estrategiku, iha Ministru Obras Públika, iha Vice Ministru Obras Públika. Iha Ministru Administrasaun e Parlamentares.

Bainhira ita haré no estuda didiak  estrutura VIII Governu ne’e hatudu momos halo politíka fahe poder ba malu hodi fó kontenti malu  tanba estrutura VIII Governu ne’e bokur demais no sobre poin malu i sei komplika ba birokrasia Governasaun nian.

Se ita haré ba méritu , membru Governu sira ne’e koloka la tuir sira nia méritu , Ezenplu Dionisio Babo ema Jurista ida kandidatu ba Ministru Negosiu Estrangeiru, Abel Pires méritu ba telekomonikasoens asumi kargu Ministru Obras Públika ida ne’e hatudu momos tau ema la tuir sira nia kapasidade rasik oinsa mak sira bele jere ministeriu ne’ebé mak sira sei lidera.

A’at liutan ita hare membru Governu barak hasoru hela prosesu Justisa, Kazu kona  sira hanesan: Francisco Kalbuadi Lay, Tomas Cabral, Marcus da Cruz, Sergio Lobo,Gastão Souça, Jacinto Rigoberto maske Tribunal seidauk foti desizaun finál maibé sira nia kazu iha prosesu nia laran tanba saida mak sei kandidatu nafatin ba membru Governu.

AMP hatudu momos halo politíka atu fó servisu malu laos halo politíka atu servi povu no liberta Povu.