PM Laiha Kapasidade Aprezenta Programa VIII Governu

Reprezentante Bankada FRETILIN iha Parlamentu Nasional Kamarada Antoninho Bianco hatete, VIII Governu ne’ebé lidera husi Primeiru Ministru José Maria Vasconselho laiha kapasidade aprezenta programa VIII Governu   no Orsamentu Jeral Estadu atu bele funsiona makina Estadu.

Reprezentante Povu Kamarada Bianco hatete, inkapasidade VIII Governu nian ikus mai atira fali kulpa ba Presidenti Repúblika, ne’e sala no kari rai rahun ba povu nia matan.

Prezidenti Repúblika ejerse ona nia kompetensia no Governu VIII  forma tiha ona, agora dehan fali Prezidenti  Repúblika impede ne’e hanoin ne’ebé sala.

Deklarasaun AMP nian hatudu momos, AMP la intende, estadu nia funsionamentu no laiha kapasidade ikus mai soe rai rahun ba Povu nia matan.

 “Hatete ba ita nia Primeiru Ministru José Maria Vasconselhos atu perpara programa dentru prazu ne’ebé konstituisaun hatete, Prezidenti Repúblika la impede, perpara mos orsamentu atu halo diskusaun,” dehan Bianco (09 Jullu 2018).

To’o ohin loron Programa AMP ba tinan 5 seidauk aprezenta tanba inkapasidade husi Primeiru Ministru José Maria Vasconselho.

“Programa lai mai, orsamentu la aprova sala laos Prezidenti da Republika, sala inkapasidade Governu atual,” dehan Bianco.

Deputadu AMP balun sita artigu 69 Konstituisaun RDTL dehan separasaun poderes, los maibe la siginifika katak, Presidenti Repúblika atu halo tuir deit Primeiru Ministru ou Govenru nia hakarak ne’e AMP nia hanoin eradu no sala tanba interdenpendensia mak iha.

Hanesan Orsamentu Jerál Estadu 145, Governu  mak elabora Orsamentu Jerál Estadu aprezenta mai Parlamentu Nasionál hodi deskute mak foin aprova  laos Parlamentu Nasional  tolan tomak deit.

AMP nia slogan dehan hamutuk hametin nasaun ho lia los maibé  laos hamutuk hametin nasaun ho lia bobar!