Solidariza ho Korruptor Xanana La Respeita Estadu

Lider rezistensia José Alexandre Gusmão (Kayralla Xanana Gusmão), eis Prezidenti da Repúblika, eis Primeiru Ministru , fundador Estadu ida, maibé hatudu desrespeitu ba Estadu ne’ebé nia rasik ho lider sira seluk mak funda no Povu Timor-Leste rihun 300 sira nia ruin no mate mak hodi haríi.

Aktu desrespeitu ba Estadu, Xanana Gusmão hatudu iha formasaun ba VIII Governu ne’ebé nia Partidu CNRT ho nia aliadu PLP ho KHUNTO mak manan, Prezidenti Repúblika Dr. Francisco Guterres Lú-Olo dekreta dekretu Prezidensial, Xanana Gusmão hetan fiar husi Primeiru Ministru Sr. José Maria Vasconselho (Taur Matan Ruak)  nudar Ministru Konselheru Primeiru Ministru maibé Sr. José Alexandre Gusmão lakohi marka prezensa atu simu posse iha loron 22 Juñu 2018 maske nia hela iha teritori Timor-Leste.

Iha loron sia (9) Juillu 2018, Prezidenti Repúblika dekreta tan dekretu Prezidensial hodi fó posse segunda vez ba membru VIII Governu , Sr. Xanana Gusmão hetan nafatin fiar husi Primeiru Ministru Sr. José Maria Vasconselho atu asumi kargu nudar Ministru Konselheru Primeiru Ministru no Ministru Planu Investimentu Estratejiku (MPIE) maibé Sr. Xanana Gusmão kontinua lakohi marka prezensa maske nia hela iha rai laran.

Hahalok Sr. Xanana Gusmão ne’e, hatudu momos nia la respeitu Estadu ida,  ne’ebé nia rasik mak harií hodi defende (solidariza) deit ba ema KORRUPTOR nain ualu (8) ne’ebé Prezidenti Repúblika Dr. Francisco Guterres Lú-Olo husu Primeiru Ministru Sr. José Maria Vasconselho atu tetu fali molok simu posse tanba ema nain ualu ne’e hasoru hela prosesu justisa no balun tanba kestaun etíka no morál.

Prezidenti Repúblika Dr. Francisco Guterres Lú-Olo ejerse nia funsaun tuir saida mak haktuir Konstituisaun RDTL.

Públiku hotu hatene katak AMP  ne’ebé kompostu husi CNRT,PLP no KHUNTO partidu PLP ho KHUNTO partidu rua ne’ebé mosu ho prinsipiu luta kontra korrupsaun.

Iha media, iha kampaiña kombate korrupsaun, boa-Governasaun no transparansia sai komprimisiu eleitorál PLP ho KHUNTO nian.

Molok formasaun VIII Governu, Espoza Primeiru Ministru atual Dona Isabel Fereira (PLP) deklara katak, VIII Governu tenki mos husi alegasaun korrupsaun, Konselheru masimu AMP Sr. José Naimori  Bucar mos deklara iha media nasionál katak, VIII Governu tenki mos husi korruppsaun, Vetaranu 24 anos Costodio Alin Laek mos deklara katak, nudar Veteranus hakarak Governu saida deit atu jere no administra Povu no Nasaun ne’e nia rikusoin tenki mos husi korrupsaun.

Problema nia hun ne’ebé akontese dadaun iha Timor-Leste relasiona formasaun VIII Governu laos husi Prezidenti Repúblika maibé  husi AMP rasik. AMP la konsege rejolve sira nia problema interna tanba Governu ida forma husi koligasaun Partidu tolu (3), entaun PLP no KHUNTU la brani atu hasé no Primeiru Ministru Sr. José Maria Vasconselho politíkamente laiha forsa politíka atu hasai naran kandidatu membru VIII Governu ne’ebé propoin husi CNRT maské juridikamente Sr. Primeiru Ministru iha kompetensia tomak atu troka ema hirak ne’ebé naran problematiku.

VIII Governu Konsititusioál forma ona, Primeiru Ministru ho Ministru, Vice, Sekretariu Estadu lubuk ida simu posse ona tanba ne’e tenpu aprezenta ona programa VIII Governu no Orsamentu Geral Estadu tanba ema nain ualu (8) atu impende ema ema millaun ida nia moris.