Lere: Labele Halo Presaun ba PR

Maijor Generál  Lere Anan Timur hatete, iha Repúblika Demokratiku Timor-Leste laiha ema ida ká grupu ida halo presaun ba Prezidenti Repúblika tanba Prezidenti Republika iha nia kompetensia rasik atu foti desizaun.

“Ha’u nu’udar elementu ba seguransa, seguransa ba órgaun soberanu hat hotu , ba nasaun tomak, órgaun hat ne’e mak representa Estadu nasaun Repúblika Demokratika Timor-Leste , ha’u dehan iha Timor la iha ema ida ké bo’ot liu Prezidente-da-Repúblika,” dehan Lere depois inkontru regular ho Xefe Estadu Palaciu Prezidenti Repúblika iha loron 8/8/2018.

Timor-Leste, tuir komadante F-FDTL ne’e, labele moris ho presaun tanba F-FDTL ho PNTL iha atu halo atuasaun hodi mantein lei no orden.

“ Ita labele moris ho presaun, labele moris ho presaun. Se Prezidente  la tuir o nia hakarak  o atu halo saida? O atu halo saida?  Ne’e mak ha’u hanoin katak ha’u apela ba Timor-oan sira lalika presiona órgaun soberanu sira, sira iha sira nia kompetensia rasik atu uja . Ami nu’udar forsa Armadas ami aparellu  do Estadu , Estadu dehan A (ne’e) A dehan  B (ne’e) B,” dehan Lere.

Komadante F-FDTL ne’e dehan, sira ne’ebé halo presaun hasoru PR ne’e sala tanba PR ne’e povu mak hili.

“Ha’u hanoin katak ekipa ida ne’ebé halo  presaun ba Prezidente (Repúblika), ha’u dehan sira sala, ita nunka presiona órgaun soberanu ida, tamba povu konfia ne’e mak tau  nia iha ne’eba, laos uluk Lú-Olo mak (hakarak) tur iha Prezidente ne’eba,  maibe uluk ne’e ataraves votasaun  e eleisaun diretu, dehan Lú-Olo,  mak sai ami nia prezidente-da-Repúblika ema maioria iha Timor mak hili balu kontra maibé ita lalika presiona, ha’u hatene katak  nia iha kompetensia ,  la hanesan  Governu no Parlamentu ,” dehan Lere.

Primeiru Ministru  iha kompetensia indizita membru Governu maibé Prezidenti Repúblika mak iha kompetensia fó pose, Lere dehan,  idaidak iha nia kompetensia labele prensiona.

“Ha’u dehan katak  guerilleiru sira  uluk halo funu ne’e dehan hanesan ne’e, halo funu atu hapara funu tamba lakohi funu, ida  ne’e mak halo funu ne’e , agora o  halo presaun ne’e nusa? Presaun ne’e tipu demostrasaun ne’e, demostrasaun, o halo demostrasaun objetivu saida ? atu halakon  buat at ruma, laos demostrasaun para agraba tan situasaun , ida ne’e mak ita hanoin katak labele aseita,” dehan Lere.

Lere dehan, Timor oan hotu -hotu tenki toma konsiensia katak TL ne’e estadu de direitu soberanu tanba ne’e Timor-oan hothotu inklui lider sira  tenki hamutuk tanba hamutuk mak  bele.