Xanana Tenta Interfere Kñar Ministeriu Públiku

Iha loron 18 fulan Janeiru 2019 , Prezidente AMP/CNRT, Sr. Kayrala Xanana Gusmão, publika karta ida ne’ebé tenta tau iha kauza Ministériu Públiku Repúblika Demokrátika de Timor-Leste nia kompeténsia no imparsialidade iha ezekusaun ba ninia servisu.

Karta ne’e públika liu husi kanál ofisiál partidu CNRT nian iha média sosiál, CNRT Media Center, hodi responde hasoru Ministériu Públiku nia investigasaun kriminál ne’ebé envolve dirijente balu ligadu ho CNRT no AMP.

Iha Parlamentu Nasional/ Díli, 1 fevereiru 2019, Bankada FRETILIN kondena tentativa hotu-hotu atu interfere iha órgaun judisiária sira nia lala’ok no apela ba líder no partidu polítiku hotu-hotu atu labele interfere iha órgaun dudisiária sira nia lala’ok.

Karta ida ne’e hanesan tentativa ida atu interfere iha ita-nia órgaun judisiária sira nia lala’ok no atu hatún públiku nia konfiansa ba ita nia órgaun judisiária sira.

 Banka FRETILIN kondena aktu hotu-hotu ho natureza ida hanesan ne’e e apela ba sidadaun hotu-hotu, liuliu lider nasionál sira, atu rekorre ba kanál apropriadu, hanesan define iha ita nia lei, atu hato’o sira nia lamentasaun ka disatisfasaun ruma hasoru prosesu judisiál sira.

Konstituisaun RDTL konsagra prinsípiu separasaun de poderes no garante kompeténsia ba órgaun de soberania hotu-hotu, inklui órgaun judisiária, atu hala’o sira nia servisu ho imparsialidade no laiha presaun. Nune’e, sidadaun hotu-hotu iha devér atu respeita no fó konfiansa iha ita-nia instituisaun judisiária sira hodi obedese no kumpre sira nia desizaun.

Bankada FRETILIN mantén respeitu no konfiansa ba ita-nia órgaun judisiária sira no apela ba sidadaun hotu-hotu, liuliu lider polítiku sira, atu labele rekorre ba aktu sira ne’ebé buka atu enfrakese ita-nia sistema judisiál sira, maibé koopera nafatin ho sira nia servisu.